Plantun de Prouvènço

Pèr coumpara dos planto d'encò nostre

Calamagrostis varia & Panicum barbipulvinatum

Calamagrostis varia

Poaceae Graminaceae

Noms en français : Calamagrostide bigarrée, Calamagrostide panachée.

Descripcioun :
Aquelo calamagroustido trachis dins li bos e fourèst (de faiard, mèle...), à la sousto dóu gros dóu soulèu. Li fueio soun pulèu larjo e longo, emé uno lengueto eslandrado. Coume tóuti, a uno souleto flour pèr espigueto (4 à 5 mm e souvènt vióuleto), emé à la baso proun de péu sedous. L'arèsto es estacado en bas de la lemma, fai un pichot couide e despasso li glumo de 0,1 à 1,4 mm (vèire li fotò).

Usanço :
Counèissen pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 0,4 à 1(1,2) m
Fueio : costo paralèlo
Tipe bioulougico : Emicriptoufite
Cicle bioulougico : Planto renadivo

Gènre : Calamagrostis
Famiho : Poaceae
Famiho classico : Graminaceae

Ordre : Poales

Coulour de la flour : Vióuleto
Petalo : ges
Ø (o loungour) enflourejado : 8 à 15 cm
Flourido : Estiéu

Sòu : Ca
Autour basso e auto : 200 à 2200 m
Aparado : Noun
Juliet à avoust

Liò : Faio - Sapiniero - Melounié - Roucas
Estànci : Subremediterran à Subaupen
Couroulougi : Ouroufito-Éurasiatico
Ref. sc. : Calamagrostis varia (Schrad.) Host, 1809

Mi(-de-ribeirés)

Panicum barbipulvinatum

Poaceae Graminaceae

Noms en français : Panic des rivages, Millet des rivages.

Descripcioun :
Aquéu mi fèr, que nous vèn d'Americo de l'uba, sèmblo proun au mi-prim, Panicum capillare, que se rescontro proun dins lis ermas e li champ à l'autouno. Se n'en destrìo emé sis espigueto de coustat que soun pourtado pèr de pecou courtet (< 3 mm) e que rèston proun proche de la ramo (< 10°). D'un biais generau lis espigueto soun mens aluenchado lis uno dis autro. Apoundèn qu'aquéstis espigueto soun mens grosso e pu fino. Pèr l'ouro es esta vist soulamen dins la valado dóu Rose, mai poudèn pensa qu'aquesto meno vai s'espandi. Coumpara emé lou mi-prim e lis àutri mi se n'avès pas l'usanço.

Usanço :
A bessai li mémis usanço que soun cousin lou mi-prim.